ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក.) នឹងរៀបចំសួនបេះដូង ស្តង់ពិព័រណ៍ តាំងបង្ហាញគំនូរកុមារចំនួន ២៤០ផ្ទាំង គំនូរអាស៊ាន និងការប្រគំតន្ត្រី នៅវិមានឈ្នះឈ្នះ នាថ្ងៃទី២៨ ខែមេសា ឆ្នាំ២០២៣ នៅវេលាម៉ោង ៤រសៀលតទៅ។ ពលរដ្ឋអាចចូលរួមដោយសេរី។

Beyond The Games នៃស.ស.យ.ក. នឹងរៀបចំការប្រគំតន្ត្រីដោយមានការចូលរួមពីសំណាក់តារាចម្រៀងជាតិ និងអន្តរជាតិល្បីៗជា ច្រើនរូប ជាមួយបទចម្រៀងនិពន្ធថ្មីរបស់យុទ្ធនាការ និងបទចម្រៀងនិពន្ធថ្មីដែលចូលរួមសហការផលិតដោយ សិល្បករ សិល្បការិនីមកពីប្រទេសអាស៊ានទាំង ១១ប្រទេស។

កម្មវិធីនេះ គឺរៀបចំឡើងដើម្បីជាឱកាសមួយសម្រាប់បង្ហាញភាពជាខ្មែរ ជាព្រះរាជាណាចក្រនៃវប្បធម៌ ជាប្រទេសដែល មានអរិយធម៌ ប្រពៃណីរុងរឿង ជាមួយវិបុលភាព សន្តិភាព ភាពរីកចម្រើន និងភាពចម្រុះនៃសក្តានុពលផ្សេងៗ របស់កម្ពុជា។

ជាមួយគ្នានេះដើម្បីបង្កើនស្មារតី លើសពីការប្រកួត តាមរយៈការបង្ហាញថាមពល និងវិបុលភាពរបស់ ប្រជាជាតិកម្ពុជា ភាពសម្បូរបែប ភាពសុខដុមនៃសង្គមកម្ពុជាក្នុងពេលបច្ចុប្បន្ន ឆ្ពោះទៅអនាគតដ៏កាន់តែរឹងមាំ។

Beyond The Games អំពាវនាវពលរដ្ឋ និងសាធារណជនចូលរួមឱ្យបានច្រើនកុះករ ដើម្បីចូលរួមសាទរដល់ភាពជាម្ចាស់ផ្ទះ របស់កម្ពុជាដោយមោទកភាព និងផ្ញើរសារគាំទ្រកីឡាករ កីឡាការិនី កម្ពុជាដែលកំពុងត្រៀមខ្លួនរួចជាស្រេច សម្រាប់ព្រឹត្តិការណ៍ស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣៕

^{PHOTO: Beyond The Games}